Ahmadjon Meliboyev 1946-yil 23-mart kuni Qirg‘izistonning O‘sh viloyatidagi Safed Bulon qishlog‘ida tug‘ilgan. 1974-yilda Toshkent davlat universiteti jurnalistika fakultetini tamomlagan.

Mehnat faoliyatini yoshlar gazetasida boshlagan. “Yosh gvardiya” nashriyotida bo‘lim muharriri, bosh muharrir o‘rinbosari bo‘lib ishlagan. O‘zbekiston televideniyesida siyosiy sharhlovchi, “O‘zbekiston adabiyoti va san’ati” gazetasida bosh muharrir, O‘zbekiston Respublikasi Prezidentining Davlat maslahatchisi vazifalarida samarali mehnat qilgan.

2018-yildan hozirga qadar “Jahon adabiyoti” jurnali bosh muharriri lavozimida faoliyat olib bormoqda.

Ahmadjon Meliboyevning “Bir zaminda yashaymiz”, “Umidli dunyo”, “Yolg‘iz yashab bo‘lmaydi”, “Hushtakni kim chaladi?”, “Umr uchar yulduz”, “Torning cho‘michdan farqi”, “Suvora sog‘inchi”, “Qirq beshinchi bekat”, “Qabohat to‘ri”, “Rizq daraxti”, “O‘zingni o‘zing boshla” nomli publisistik to‘plamlari, “O‘ng‘or ertaklari”, “Safed Bulon hikoyalari” kabi nasriy asarlari nashr etilgan.

Ahmadjon Meliboyev 1997-yilda “Shuhrat” medali, 2018-yilda “Do‘stlik” ordeni, 2021-yilda “O‘zbekistonda  xizmat ko‘rsatgan jurnalist” unvoni bilan taqdirlangan. 2019-yilda “Oltin qalam” tanlovi g‘olibi bo‘lgan.

O‘zbekiston Milliy universiteti jamoasi taniqli jurnalist Ahmadjon Meliboyevni tavallud ayyomi bilan qutlab, ustozga sihat-salomatlik, uzoq umr, ijodiy va kasbiy faoliyatida ulkan muvaffaqiyatlar tilaydi.

O‘zMU Axborot xizmati