2–3-fevral kunlari Toshkent shahrida “Oliy ta’limda sifatni ta’minlash tamoyillari” mavzusida xalqaro ekspertlar ishtirokida o‘quv seminari bo‘lib o‘tdi. Seminar O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi, Buyuk Britaniyaning Quality Assurance Agency (QAA) hamda British Council hamkorligida tashkil etildi.

Ikki kunlik o‘quv mashg‘ulotlarida agentlik xodimlari va oliy ta’lim muassasalari ta’lim sifatini oshirish bo‘limlari rahbarlari ishtirok etdi. Jumladan, O‘zbekiston Milliy universiteti Ta’lim sifatini nazorat qilish bo‘limi boshlig‘i Shuhrat Lakayev ham seminar ishtirokchilari safida bo‘ldi.

Tadbir davomida oliy ta’limda ichki va tashqi sifatni ta’minlash tizimlari, baholashda dalillarga asoslangan yondashuvlar, xalqaro standartlar (ESG) hamda milliy sifat talablari bo‘yicha amaliy mashg‘ulotlar o‘tkazildi. Seminar yakunida ishtirokchilarga sertifikat topshirildi.