Qadrli hamkasblar, hurmatli professor-o‘qituvchilar!
Aziz talaba-yoshlar!
Sizlarni mehr-oqibat, ezgulik va saxovat ayyomi – muborak Ramazon hayiti bilan samimiy tabriklayman. Barchangizga tinchlik-omonlik, sihat-salomatlik, baxtu saodat va ulkan muvaffaqiyatlar yor bo‘lishini tilab qolaman.
Bunday ulug‘ ayyomlar sharofatidan jonajon Vatanimiz tinchligi, ravnaqi, xalqimiz farovonligi, hamjihatligi yanada mustahkam bo‘lsin!
Shukrlar aytamizki, Yaratganning nazari tushgan muqaddas yurtimiz o‘z taraqqiyot yo‘li sari dadil odimlab bormoqda. Davlatimiz rahbarining sa’y-harakatlari, olijanob xalqimizning ezgu maqsad yo‘lida birdamligi tufayli amalga oshirilayotgan islohotlar o‘z samarasini bermoqda.
Bugungi tarixiy o‘zgarishlar davrida ta’lim sohasida faoliyat olib borayotgan mas’ullar, pedagoglar, professor-o‘qituvchilar zimmasidagi mas’uliyat yuki ham ortib boraveradi. Prezidentimiz ta’kidlaganidek, yoshlarimizni azaliy qadriyatlarimiz bilan birga zamonaviy bilim va kasb-hunarlarni puxta egallagan, Vatan tuprog‘ini ko‘ziga to‘tiyo qilib yashaydigan insonlar etib tarbiyalash asosiy burchimiz ekanini doimo yodda tutishimiz lozim.
El-yurt xizmatida sadoqat, fidoyilik va halollik bilan mehnat qilayotgan Siz aziz ustozlarimiz, ilmdek sharafli yo‘ldan dadil odimlayotgan navqiron farzandlarimizni yana bir karra bayram bilan tabriklab, kattadan-katta muvaffaqiyat va zafarlar, kuch-quvvat tilayman! Ilm-fan yo‘lidagi izlanishlaringiz manfaatli va samarali bo‘lsin!
Ahli xonadonlarimizga totuvlik, baraka, fayzu tarovat ato etsin! Yurtimizga tinchlik, xalqimizga omonlik bersin!
Barchamizga mamlakatimizda keng nishonlanayotgan Ramazon hayiti muborak bo‘lsin!
Inom Madjidov,
Mirzo Ulug‘bek nomidagi O‘zbekiston Milliy universiteti rektori
