Assalomu alaykum!
Qadrli hamkasblar, hurmatli professor-o‘qituvchilar!
Aziz talabalar!
Sizlarni kirib kelayotgan yangi – 2025-yil bilan chin dildan tabriklayman.
O‘tgan 2024 yilda jamoamiz bilan birga turli yo‘nalishlar bo‘yicha bir qator muvaffaqiyatli natijalarni qo‘lga kiritdik, arzigulik yutuqlarga erishdik.
Raqamlarga to‘xtaladigan bo‘lsak, universitetda 2024/2025 o‘quv yilida 4 ta yangi bakalavriat yo‘nalishi (“Kadastr”, “Kortografiya va masofadan zondlash”, “Geodeziya va geoinformatika”, “Gidrogeologiya va muhandislik geologiyasi”), 2 ta magistratura (“Korporativ strategiyalar”, “Davlat boshqaruvi”) mutaxassisliklari ochildi.
Birinchi kurslar uchun mavjud ta’lim yo‘nalishlari (56) va uning negizidagi magistratura mutaxassisliklari (59) ning davlat malaka talablari, o‘quv rejalari va fan dasturlari TOP-300 talikka kirgan nufuzli OTMlar tajribasi asosida ishlab chiqildi va joriy etildi.
2024/2025 o‘quv yilida bakalavriat ta’lim yo‘nalishiga jami 6650 nafar (kunduzgi – 4223, sirtqi – 1750, kechki – 374, masofaviy – 303) abituriyent, magistratura mutaxassisliklari uchun esa jami 972 nafar talabgor o‘qishga qabul qilindi. Bugungi kunda 34 mingdan ortiq talaba universitetimizda tahsil olmoqda.
O‘quv jarayoniga 100 dan ortiq xorijiy mutaxassislar jalb qilindi. Ish beruvchilar bilan 200 dan ortiq shartnomalar imzolandi. Oliy ta’lim muassasalarini (ularning 90 foizi universitetimizni tugatgan) tamomlagan 120 dan ortiq magistrlar ishga qabul qilindi. Bu albatta yoshlarimizning oliy ta’limda qolib ishlashga xohishi oshib borayotgani, professor-o‘qituvchilarning o‘rtacha yoshi kamayib, jamoamiz yosharayotganini ko‘rsatadi.
2024-yilda universitetda 140 nafardan ortiq falsafa doktori (PhD) hamda 35 nafar fan doktori (DSc) ilmiy darajasini olish uchun himoya o‘tkazildi. Scopus bazasida universitet profili bo‘yicha chop etilgan ilmiy maqolalar soni 700 tadan oshdi.
Umumiy qiymati 21 mlrd so‘mdan oshiq bo‘lgan 44 ta loyiha, jumladan, 20 ta fundamental, 19 ta amaliy, 4 ta innovatsion hamda 1 ta noyob obyekt loyihalari bajarilmoqda.
O‘zbekiston Milliy universiteti joriy yilda bir nechta xalqaro reytinglarda o‘z natijalarini yaxshilab, yuqori darajali universitetlar ro‘yxatiga kirdi.
Jumladan, muassasamiz dunyoning eng nufuzli universitetlari reytingida (QS World University Rankings-2025) 781-790-o‘rinlarni egallab, TOP-1000 universitetlar qatoridan joy oldi.
Times Higher Education (THE) xalqaro oliy ta’lim tahliliy agentligining 2025-yil uchun dunyoning eng yaxshi universitetlari reytingi – “THE World University Rankings-2025” natijalariga ko‘ra O‘zbekiston Milliy universiteti 1001-1200 o‘rinlarni qayd etdi.
Innovatsiyalar bo‘yicha dunyo universitetlari reytinggida Top-150 talikdan o‘rin egalladi, Fanlararo fan reytingi natijalariga ko‘ra 251-300 o‘rinlarni qayd etib, Markaziy Osiyo OTMlari orasida peshqadam bo‘ldi.
Shuningdek, 16 ta Barqaror rivojlanish maqsadlari bo‘yicha o‘tgan yilga nisbatan 400 o‘rin yuqorilab, dunyoda 601-800-o‘rinlarni qayd etdi.
“Eng yaxshi talabalar turar joylariga joylashtirish uchun xizmat ko‘rsatish markazi” Respublika tanlovida universitetimiz jamoasi 1-o‘rinni qo‘lga kiritgani ushbu yo‘nalishdagi ishlarning tizimli tashkil etilganini ko‘rsatadi, albatta.
Talabalarimizni munosib turar joy bilan ta’minlash maqsadida davlat xususiy sherikchilik asosida har biri 1000 o‘rinli bo‘lgan 2 ta yangi talabalar turar joyi binosi qurilmoqda.
Jizzax viloyati Zomin, Forish, Arnasoy va Sirdaryo viloyati Xovos tumanlarining turizm jozibasini oshirish, turizm sohasini rivojlantirish, maktablar va professional ta’lim tashkilotlariga zarur o‘quv-uslubiy ko‘mak berish bo‘yicha tegishli hokimliklar, tashkilot va muassasalar bilan faol hamkorlik olib borildi, 100 ga yaqin ilmiy, ma’naviy-ma’rifiy tadbirlar tashkil etildi.
Qolaversa, universitetimizning iqtidorli yoshlari, talabalarimiz ilm-fan, madaniyat va sport yo‘nalishlaridagi turli olimpiadalar, tanlov va musobaqalarda muvaffaqiyatli natijalarni qo‘lga kiritdi.
Parijda bo‘lib o‘tgan Yozgi Olimpiya va Paralimpiya o‘yinlarida Taekvondo va sport faoliyati fakulteti talabalari yorqin natijalarni qayd etdi. Jumladan, Ulug‘bek Rashitov oltin, Svetlana Osipova kumush, Paralimpiya o‘yinlarida esa Asadbek Toshtemirov oltin, Ziyodaxon Isoqova esa kumush medalga sazovor bo‘lishdi.
210 nafar iqtidorli talabalarimiz xalqaro va respublika fan olimpiadalarida qatnashishdi. Ulardan 71 nafari g‘olib va sovrindor bo‘lib, 17 ta oltin, 29 ta kumush, 25 ta bronza medallarni qo‘lga kiritishdi. Joriy o‘quv yilida 24 nafar talabamiz, ulardan 5 nafari Prezident, 19 nafari nomli davlat stipendiyalariga sazovor bo‘lishdi.
Yil so‘ngidagi yana bir xushxabar, universitetimizning zakovatli talabalari respublika oliy ta’lim muassasalari talabalari o‘rtasida o‘tkazilgan Intellektual olimpiadada umumjamoa hisobida 3-o‘rinni egallab, Prezident sovg‘asi — 1 mlrd so‘m pul mukofoti bilan taqdirlangani barchamizni cheksiz quvontirdi.
Farzandlarimizning sifatli ta’lim va tarbiya olib, barkamol shaxs bo‘lishlari uchun boshlagan ishlarimizni izchil davom ettiramiz.
So‘zimni yakunlar ekanman, Yangi yil jamoamizga yangidan-yangi yutuqlar va muvaffaqiyatlar olib kelsin, deb qolaman.
Sizlarni yana bir bor kirib kelayotgan Yangi yil bilan chin qalbimdan samimiy tabriklayman!
Barchangizga sihat-salomatlik, xonadonlaringizga fayzu baraka, oilaviy baxtu saodat tilayman.
Yangi yilning qadami qutlug‘ kelsin!
Yangi yil barchamizga muborak bo‘lsin!
Inom Madjidov,
O‘zbekiston Milliy universiteti rektori
