Қадрли ҳамкасблар, ҳурматли профессор-ўқитувчилар! Азиз талаба-ёшлар!

Сизларни эзгулик, меҳр-мурувват, саховат ва бағрикенглик рамзига айланган файзли айём Қурбон ҳайити билан самимий табриклайман. Барчангизга тинчлик-омонлик, сиҳат-саломатлик, бахту саодат ва улкан муваффақиятлар ёр бўлишини тилаб қоламан.

Шукрлар бўлсинки, Яратганнинг назари тушган муқаддас юртимиз ўз тараққиёт йўли сари дадил одимлаб бормоқда. Давлатимиз раҳбарининг саъй-ҳаракатлари, олижаноб халқимизнинг эзгу мақсад йўлида бирдамлиги туфайли амалга оширилаётган ислоҳотлар ўз самарасини бермоқда.

Бугунги тарихий ўзгаришлар даврида таълим соҳасида фаолият олиб бораётган масъуллар, педагоглар, профессор-ўқитувчилар зиммасидаги масъулият юки ҳам ортиб бораверади.

Яқиндагина жамоамиз билан халқаро майдондаги қувончли ютуқни қарши олдик. Яъни, Ўзбекистон Миллий университети дунёнинг энг яхши университетлари рейтингида (QS World University Rankings 2025) 781-790-ўринларни қайд этиб, ТОП-1000 университетлар қаторидан жой олди.

Бу муваффақият давлатимиз раҳбари томонидан белгилаб берилган вазифаларни янада мукаммал, масъулият билан бажаришга ундайди, янги-янги марраларни белгилаб беради.

Эл-юрт хизматида садоқат, фидойилик ва ҳалоллик билан меҳнат қилаётган Сиз азиз устозларимиз, илмдек шарафли йўлдан дадил одимлаётган навқирон фарзандларимизни яна бир карра муқаддас айём билан табриклаб, каттадан-катта муваффақият ва зафарлар, куч-қувват тилайман!

Аҳли хонадонларимизга тотувлик, файзу барака ато этсин, юртимизга тинчлик, халқимизга омонлик берсин!

Барчамизга мамлакатимизда кенг нишонланаётган Қурбон ҳайити муборак бўлсин!

Ином Маджидов, Мирзо Улуғбек номидаги Ўзбекистон Миллий университети ректори