1969 yili tashkil etilgan “Fakultetlararo umumiy fizika”, 1976 yilda tashkil etilgan “Fizikani o‘qitish uslubi va tarixi” va 1955 yili faoliyatini boshlagan “Atmosfera fizikasi” kafedralari 2005-yili birlashtirilib, “Umumiy fizika, fizikani o‘qitish uslubi va atmosfera fizikasi” kafedrasi tashkil etildi va 2011 yildan “Umumiy fizika” kafedrasi deb yuritilmokda Universitet tashkil etilgan kundan boshlab Fizika kafedrasi o`z faoliyatini boshlagan. Kafedra ishini rivojlantirishga taniqli olimlar N.N.Zlatovratskiy, A.E.Levashev, N.V.Krimenevskiy, L.N.Dobretsov katta hissa qo`shganlar. Fizikaviy elektronika kafedrasining shakllanishida buyuk olimlar A.N. Dobretsov, S.V. Starodubsev, U.A. Arifov va G.N.Shuppelarning xizmatlari juda kattadir. Kafedra 1936 yilda tashkil etilgan bo‘lib, u eksperimental fizika, elektronika, elektro–fizika nomlari bilan yuritilgan. 1957 yildan esa Fizikaviy elektronika nomi bilan atalgan. Fizikaviy elektronika kafedrasiga 1957-1966 yillarda G.N. Shuppe, 1966-1972 va 1980-1991 yillarda prof. V.I. Veksler, 1972-1980 va 1991-1993 yillarda dots. A.A. Adilov, 1993-1995 yillarda akad.O‘.X.Rasulev mudirlik qilgan. 1995-2009 yillarda kafedraga dots.N. Norqulov, 2009-2011 yillarda prof U.SH.Begimqulov mudirlik qilgan.
1969–91 yillar davomida “Fakultetlararo umumiy fizika” kafedrasini “Qattiq jismlar fizikasi va kimyosi” sohasidagi atoqli olim prof. M.A. Ma’rupov boshqardi. “Fakultetlararo umumiy fizika” kafedrasining mudiri prof. M.A. Ma’rupovning universitetlarda va umuman oliy maktabda fizika fanini o‘kitishni takomillashtirish borasidagi xizmatlari alohida diqqatga sazovor. Shuningdek, o‘nga yaqin fan nomzodlari tayyorladi va o‘ziga xos ilmiy maktab yaratildi.
1976 yili professor E.N. Nazirov tashabbusi bilan “Fizika metodikasi va tarixi” kafedrasi O‘zbekistonda birinchi marta tashkil etildi. E.N. Nazirov ushbu kafedra mudiri lavozimiga tayinlandi va umrining oxirigacha (1976-2004) ushbu vazifada fidokorona faoliyat ko‘rsatdi.
Umumiy fizika kafedrasiga 1991 yildan 2012 yilgacha professor U.Abdurahmanov, 2012–2013 yillarda professor A.V.Umarov mudirlik qilgan bo‘lsa, 2013 yildan boshlab dotsent D.A.Begmatova kafedra mudiri sifatida faoliyat yuritib kelmoqda.
Kafedra professor-o‘kituvchilari fizika, astronomiya, tibbiyot fizikasi hamda universitetning kimyo, matematika, kompyuter texnikasi, biologiya, geologiya va tuproqshunoslik, falsafa fakultetlari talabalariga umumiy fizika fani bo‘yicha ta’limni amalga oshiradi. Professor-o‘qituvchilar ilmiy tadqiqot ishlari bilan bir qatorda fizika fanini o‘qitish uslubini takomillashtirishga, ilmiy metodik ishlarni rivojlantirishga, yangi laboratoriya ishlarini yaratishga va ularni o‘quv jarayonida qo‘llashga, dars jarayonida texnik vositalardan foydalanishga katta e’tibor berib kelmoqda.
Keyingi yillarda kafedrada katta ilmiy-xodim izlanuvchilar instituti faoliyati yaxshi yo‘lga qo‘yilgan. Jumladan, prof. U.Abdurahmonov rahbarligida 4 ta fan nomzodi, prof. K.A.Tursunmetov rahbarligida 9 ta fan nomzodi, prof. M.Qurbonov rahbarligida 7 ta pedagogika fanlari bo‘yicha falsafa doktori (PhD), 1 ta pedagogika fanlari doktori (DSc), dots. D.A.Begmatova rahbarligida 3 ta fan nomzodi himoya qilishdi. Hozirgi kunda kafedradagi professor-o‘qituvchilar ustoz-shogird tizimi asosida 12 ta tayanch doktorant va mustaqil tadqiqotchilar bilan ilmiy tadqiqot ishlarini olib borishmoqda.
Kafedrada darsliklar, o‘quv qo‘llanmalari va o‘quv uslubiy materiallar tayyorlashga katta e’tibor berib kelinmoqda. Jumladan, kafedra jamoasi 1990-2021 yillarda 7 ta monografiya, 20 dan ortiq o‘quv qo‘llanma va 30 ga yaqin o‘quv-uslubiy qo‘llanmalarni tayyorlashdi va chop ettirishdi hamda darsliklar, qator yangi o‘quv laboratoriya qurilmalari ishlab chiqildi.
