O’zbekiston Milliy universiteti tomonidan “Yoshlar va etnoturizm” shiori ostida Zomin tumanida II-Xalqaro talaba-yoshlar Zomin forumi tashkil etildi.
Tadbir doirasida talaba-yoshlar Zomin tarixiy muzeyiga tashrif buyurib, mahalliy madaniy meros bilan yaqindan tanishdilar. Shuningdek, 9-may – Xotira va qadrlash kuni munosabati bilan Zomindagi Ona haykali ziyorat qilindi.
Forumning asosiy qismi Zomin tumanidagi yozgi dam olish maskanida bo‘lib o‘tdi. Unda milliy kuy-qo‘shiqlar sadolari ostida raqslar ijro etildi, xorijiy talabalar tomonidan milliy va zamonaviy raqslar namoyish qilindi.
Shuningdek, ishtirokchilar tomonidan tayyorlangan qiziqarli sahna ko‘rinishlari barchaga katta taassurot qoldirdi. Tadbir do‘stona muhitda o‘tib, turli millat vakillari o‘rtasida madaniy almashinuvni kuchaytirishga xizmat qildi.
Forum yakunida ishtirokchilar madaniy dastur hamda do‘stona muhitda muloqotlar orqali o‘zaro fikr almashdilar. Tadbir yoshlarning ijtimoiy faolligini oshirish va yurtimizni dunyoga tanitish yo‘lida muhim qadamlardan biri bo‘ldi.
“Xalqaro talaba-yoshlar Zomin forumi” talabalarga bir nechta muhim imkoniyat va foydalar beradi:
1. Madaniy va tarixiy bilimlarni oshirish – Forum davomida talabalarga Zominning tarixiy joylari, milliy qadriyatlari va etnoturizm imkoniyatlari bilan tanishish imkoni yaratildi.
2. Vatanparvarlik va qadriyatlarni anglash – “Xotira va qadrlash kuni” munosabati bilan tashkil etilgan tadbirlar talabalarda tarixga hurmat va milliy g‘ururni kuchaytiradi.
3. Tashabbus va liderlik ko‘nikmalari – Turli hudud va xorijiy ishtirokchilar bilan muloqot qilish orqali talabalar kommunikativ, tashabbuskorlik va jamoada ishlash ko‘nikmalarini rivojlantiradi.
4. Yangi do‘stlik va hamkorlik aloqalari – Forum turli universitetlardan kelgan talabalar o‘rtasida do‘stona aloqalarni o‘rnatish va kelajakdagi loyihalarda hamkorlik qilish imkonini beradi.
5. Turizm sohasiga qiziqishni kuchaytirish – Forum orqali talabalar turizm, ayniqsa etnoturizm sohasining iqtisodiy va madaniy ahamiyatini chuqur anglab, bu yo‘nalishda faoliyat yuritish istagini orttirishadi.
O‘zMU Axborot xizmati
