M.Auezov nomidagi Janubiy Qozog‘iston universiteti rektori Darxan Axmed-Zaki boshchiligidagi delegatsiya O‘zbekiston Milliy universitetida bo‘ldi. Mehmonlarni rektor Inom Madjidov qabul qildi.
Dastlab O‘zMU rektori Darxan Axmed-Zakini ushbu yilda M.Auezov nomidagi Janubiy Qozog‘iston universiteti rektori lavozimiga tayinlangani munosabati bilan qutladi va mazkur oliy ta’lim muassasasi O‘zMUning nafaqat Qozog‘istondagi balki mintaqadagi strategik hamkorlaridan biri ekanligini ta’kidladi.
Darxan Axmed-Zaki O‘zbekiston Milliy universitetiga O‘zbekiston Respublikasi Prezidentining Qozog‘istonga qiladigan tashrifiga tayyorgarlik ko‘rish doirasida kelganini bildirdi. Qozog‘istonlik mehmon O‘zMU bilan keng miqyosda hamkorlikni yanada rivojlantirishga xayrixoh ekanini bildirdi.
Tomonlar o‘zaro manfaatli hamkorlik yo‘nalishlari va istiqbollari bo‘yicha fikr almashishdi va muhim tashabbuslarni ilgari surishdi. Uchrashuv yakunida ikki universitet rektorlari tomonidan qo‘shma ta’lim dasturini yo‘lga qo‘yishga qaratilgan kelishuv imzolandi.
Tashrif mobaynida mehmonlar O‘zMU bazasida yaratilgan zamonaviy laboratoriyalar bilan yaqindan tanishishdi.
O‘zMU Axborot xizmati
