Ushbu veb-sayt hozirda test rejimida ishlamoqda. Ba'zi funksiyalar mavjud bo‘lmasligi yoki kutilganidek ishlamasligi mumkin.

Xalqaro aloqalar bo`yicha prorektor

Shirinova Raima Hakimovna (filologiya fanlari doktori, professor)

  • 100174, Toshkent shahar, Olmazor tumani, Universitet ko’chasi, 4-uy
  • Seshanba, soat 10:00-13:00
  • +998 71 246-54-13
  • +998 71 246-22-42
  • r.shirinova@nuu.uz

Biografiya

Raima Shirinova 1971-yil 21-dekabr kuni Buxoro viloyatida tug‘ilgan.
1988–1993-yillarda Toshkent davlat universitetida tahsil olib, “Filologiya va tillarni o‘qitish: fransuz tili” yo‘nalishi bo‘yicha bakalavr va magistr darajalarini qo‘lga kiritgan.
2002-yilda “Diniy realiyalarni tarjima qilishning o‘ziga xos xususiyatlari” mavzusidagi falsafa doktori (PhD) ilmiy darajasini, 2017-yilda esa “Olam milliy manzarasining badiiy tarjimada qayta yaratilishi” mavzusida doktorlik (DSc) dissertatsiyasini muvaffaqiyatli himoya qilgan. Fan doktori, professor, Turon akademiyasining akademigi (2019 yil).
2005–2009-yillarda O‘zbekiston Milliy universitetida “Yurisprudensiya” yo‘nalishi bo‘yicha ikkinchi mutaxassislikni muvaffaqiyatli tamomlagan.
2017–2019-yillarda O‘zbekiston–Fransiya Do‘stlik Jamiyatida ijrochi direktor (jamoat asosida) sifatida faoliyat yuritib kelmoqda.
2019-yildan buyon O‘zbekiston Milliy universitetida xalqaro aloqalar bo‘yicha prorektor lavozimida ishlab kelmoqda. Shu bilan birga, 2020-yildan OWSD (Women in Science for the Developing World) tashkilotining Markaziy Osiyo bo‘yicha rais o‘rinbosari hamda O‘zbekiston xotin-qizlar “Olima” uyushmasi rais o‘rinbosari sifatida faoliyat olib bormoqda.
Raima Shirinovaning ilmiy tadqiqotlari asosan tarjima nazariyasi va amaliyoti, mamlakatshunoslik, lingvomadaniyatshunoslik, leksikografiya, frazeografiya, parallel korpus va ta’lim sohalariga yo‘naltirilgan. Ushbu yo‘nalishlarda “Web of Science” va Scopus bazasida indekslangan nufuzli xalqaro ilmiy jurnallarda maqolalari chop etilgan.
2017–2023-yillar mobaynida malaka oshirish va ilmiy tajriba almashish maqsadida Fransiya (University of Tours, University of Poitiers, Sorbonne University), Ispaniya (University of Seville, Universidad de Granada), Germaniya (Hanover University, Freie Universität Berlin), Italiya (Milano-Bicocca University) kabi nufuzli xorijiy universitetlarda stajirovka o‘tgan.

Xalqaro tajribasi va yutuqlari
– Universitet prorektori sifatida O‘zbekiston Milliy universitetining QS, THE va WURI kabi xalqaro reytinglarda munosib o‘rin egallashini ta’minlashga hissa qo‘shib kelmoqda.
Jumladan universitet O‘zbekiston OTMlari ichida birinchilardan bo‘lib QS va THE xalqaro agentliklari tomonidan har yili yangilanib boriladigan reytinglarda eng yaxshi top 1000 universitetlari orasida joy egallab kelmoqda.
– Universitetda tashkil etiladigan hamda xorijiy davlatlar Fransiya, Germaniya, Italiya, Ispaniya, Belgiya, Xitoy, Finlyandiya, Rossiya va Markaziy Osiyo davlatlari yoshlari ishtirok etadigan “Xalqaro yozgi maktab” tashabbuskori.
– Fransiya, Germaniya, Italiya, Ispaniya, Portugaliya va Xorvatiyaning nufuzli universitetlari bilan Erasmus+ grantlari doirasida samarali hamkorlik yo‘lga qo‘yildi.

Milliy va xalqaro e’tiroflar
Faoliyati davomida Raima Shirinova bir qator yuksak mukofotlar bilan taqdirlangan, jumladan:

  1. “O‘zbekiston mustaqilligining 25 yilligi” esdalik nishoni (2016),

  2. “O‘zbekiston Konstitutsiyasining 25 yilligi” esdalik nishoni (2017),

  3. Fransiyaning “Ordre des Palmes Académiques” ordeni (2019),

  4. “Oliy ta’lim a’lochisi” ko‘krak nishoni (2023).

Vazifa va funksiyalari

  • O‘zbekiston Respublikasi Prezidentining 2017-yil 20-apreldagi PQ-2909-sonli “Oliy ta’lim tizimini yanada rivojlantirish chora-tadbirlari to‘g‘risida”gi Qarorida belgilangan vazifalarni amalga oshirish, professor-o‘qituvchilarni malakasini oshirish, xorijiy ilg‘or tajribani o‘rganish va o‘quv jarayoniga tadbiq etish borasida muayyan ishlarni amalga oshirish.
  • Vazirlikning 2005-yil 13-apreldagi «Oliy ta’lim muassasalaridan xorijiy safarlarga borish to‘g‘risida»gi 81-sonli buyrug‘iga binoan chet el safarlariga yuborilayotgan universitetning vakillari hujjatlarini ko‘rib chiqish va muvofiqlashtirish.
  • Donor mamlakatlar va xalqaro moliya institutlarining texnik yordam dasturlari doirasida universitetda amalga oshirilayotgan loyihalarning monitoringini olib borish va har chorakda Oliy va o‘rta maxsus ta’lim vazirligiga hisobot kiritish.
  • Yevropa Ittifoqining dasturlari bo‘yicha universitet tomonidan tayyorlangan loyihalarni ko‘rib chiqish va Yevropa Ittifoqi Komissiyasiga moliyalashtirish uchun vazirlikning tegishli xulosa va tavsiyalarini tayyorlash.
  • Universitet professor-o‘qituvchilari, xodimlari va talabalari uchun loyihalar tahlili asosida seminar, davra suhbatlarini tashkil qilish.
  • Universitetning xorijiy hamkorlar bilan tuzadigan bitim, shartnoma va protokollarini ko‘rib chiqish, tahlil qilish va tavsiyalar berish. Zarurat bo‘lganda hujjatlarni tegishli tashkilotlar bilan kelishish.
  • O‘zbekiston Respublikasi Prezidenti, O‘zbekiston Respublikasi hukumati, Tashqi ishlar vazirligi, Tashqi iqtisodiy aloqalar, savdo va investitsiyalar vazirligi, Iqtisodiyot vazirligi nazoratidagi O‘zbekiston Respublikasining xalqaro munosabatlar va xalqaro iqtisodiy aloqalarga doir qabul qilingan hujjatlar ijrosini ta’minlash.
  • O‘zbekistonda faoliyat ko‘rsatayotgan elchixonalar va xalqaro ta’lim tashkilotlari va jamg‘armalari bilan hamkorlikda ta’lim sohasining ustuvor yo‘nalishlari bo‘yicha seminar, o‘quv kurollari va ilmiy-amaliy anjumanlar o‘tkazish.
  • Xorijiy mamlakatlar ta’lim vazirliklari, xalqaro ta’lim tashkilotlari va diplomatik vakolatxonalar vakillari, chet el oliy ta’lim muassasalari delegatsiyalari bilan uchrashuvlarni tashkil kilish.
  • Xorijiy fuqarolarni o‘qitishdan kelib tushadigan valyuta tushumlari haqida oylik, chorak, yarim yillik va yillik hisobotlarni Oliy va o‘rta maxsus ta’lim vazirligi so‘rovlariga binoan tayyorlab borish.
  • Xorijiy hamkorlar tomonidan stajirovka o‘tash, malaka oshirish, o‘quv kurslarida qatnashish, magistratura va doktoranturada tahsil olish uchun e’lon qilinadigan grantlar tanloviga universitet professor-o‘qituvchilari, talaba, magistrant va stajyor-tadqiqotchi-izlanuvchilarini tavsiya etish.
  • E’lon qilinayotgan xalqaro grantlar haqida axborot jamlab tarqatish va universitet kafedralariga loyihalar tuzishga ko‘maklashish, hamda loyiha ijrosiga bevosita ishtirok etish.
  • Xalqaro miqyosda o‘tkaziladigan tadbirlar, konferensiyalar, seminarlar haqida ma’lumotlarni to‘plash va fakultetga yetkazish. Universitetda o‘tkaziladigan anjumanlar haqida axborot tarqatish, universitet veb saytini yangilab borishga yordam ko‘rsatish.