O‘zbekiston Milliy universiteti Ijtimoiy fanlar fakulteti «Yurisprudensiya» yo‘nalishining 3 nafar talabalari Turanov Diyorbek, Yaxshiboyev Mirvohid hamda Nizomov Nurshod xalqaro talabalar mobilligi dasturi doirasida Polsha Respublikasining Gdansk universitetida o‘qish imkoniyatiga ega bo‘ldi.
Ushbu dastur doirasida talabalar 2025-yil 1-oktabrdan 2026-yil 15-fevralga qadar Gdansk universitetida tahsil olib, o‘z bilim va tajribalarini boyitishadi.
Mazkur xalqaro imkoniyat ular uchun nafaqat ta’lim jarayonida yangi yondashuvlarni o‘rganish, balki xorijiy hamkasblar bilan tajriba almashish, madaniyatlararo muloqot ko‘nikmalarini rivojlantirish uchun ham muhim ahamiyat kasb etadi.
Tashrifning dastlabki kunlari ham mazmunli tashkil qilinib, xorijiy talabalar uchun katta ochilish marosimi bo‘lib o‘tdi. Unda turli mamlakatlardan kelgan talabalar ishtirok etishdi va ularga shahar hayoti hamda universitet imkoniyatlari tanishtirildi.
