O‘zbekiston Milliy universiteti talabalari “Yangi hayot uchun, yangi O‘zbekiston uchun!” shiori ostida ichki turizmni rivojlantirish va tarixiy yodgorliklar bilan yaqindan tanishish maqsadida Buxoro shahriga sayohat uyushtirdi.

Sayohat davomida talabalar Buxoroning boy madaniy merosi, tarixiy obidalari va milliy qadriyatlari bilan yaqindan tanishdilar. Ulug‘bek madrasasi, Poyi Kalon majmuasi, Ark qo‘rg‘oni, Labi Hovuz kabi tarixiy maskanlarga tashrif buyurib, ajdodlarimiz qoldirgan bebaho me’moriy yodgorliklar haqida qimmatli ma’lumotlarga ega bo‘ldilar.

Mazkur tashabbus talabalar orasida vatanparvarlik tuyg‘usini mustahkamlash, milliy qadriyatlarni chuqur o‘rganish va ichki turizmni yanada rivojlantirishga xizmat qiladi. Sayohat ishtirokchilari bu boradagi taassurotlari bilan o‘rtoqlashib, Buxoroning o‘ziga xos muhitidan katta zavq olishganini ta’kidladilar.

O‘zbekiston Milliy universiteti bunday ma’rifiy safarlarni kelgusida ham davom ettirib, talabalarni yurtimizning tarixiy obidalari bilan yaqindan tanishtirishga qaratilgan loyihalarni amalga oshirishni rejalashtirmoqda.