Bugun, O‘zbekiston Milliy universitetida Vatanimiz Mustaqilligining 33 yilligi munosabati bilan, shuningdek, birinchi kursga qabul qilingan talabalar bilan tanishuv maqsadida bayram tadbiri tashkil etildi.

Unda universitet rahbariyati, ilm-fan vakillari, akademiklar, O‘zbekiston yozuvchilar uyushmasi a’zolari, talabalar va ularning ota-onalari hamda keng jamoatchilik vakillari ishtirok etdi.

Dastlab universitet rektori Inom Madjidov yig‘ilganlarni O‘zbekiston Respublikasi Mustaqilligining 33 yilligi bilan qizg‘in tabriklab, birinchi kursga qabul qilingan talabalarga muvaffaqiyat tiladi. Farzandlarimizning kelajagi uchun otaxon universitetimiz haqiqiy tirgak, mustahkam poydevor bo‘lishini bildirdi.

Shuningdek, tadbirda O‘zbekiston yozuvchilar uyushmasi raisi o‘rinbosari Minhojiddin Mirzo, O‘zbekiston Qahramoni, akademik, Shavkat Ayupov, akademiklar Abdulla A’zam, Shavkat Alimov, Azimboy Sa’dullayevlar so‘zga chiqib, talabalarni tabriklashdi.

Parijda bo‘lib o‘tgan Yozgi Olimpiya o‘yinlarida kumush medalga sazovor bo‘lib, taekvondo bo‘yicha Olimpiya o‘yinlarida medal qo‘lga kiritgan birinchi ayol sportchi sifatida tarixga kirgan O‘zMU talabasi Svetlana Osipova ham barchani bayram bilan qutlab, uni qo‘llab-quvvatlagan universitet rahbariyati, professor-o‘qituvchilarga minnatdorchilik bildirdi.

Tadbir so‘nggida san’atkorlar ishtirokida badiiy-musiqiy chiqishlar ishtirokchilar e’tiboriga havola qilindi.